زيزو يقرر مغادرة تدريبات الزمالك بعد قرار تجميده واستبعاده

غادر أحمد مصطفى زيزو لاعب الفريق الأول لكرة القدم بنادي الزمالك، تدريبات الفريق دون استكماله بعد خروجه من حسابات الجهاز الفني لمباراة الغد أمام ستلينبوش في الكونفدرالية.

وكان نادي الزمالك، قرر استبعاد زيزو من التواجد في مباراة الكونفدرالية، وتجميده، عقب التأكد من توقيعه للنادي الأهلي الغريم التقليدي، خلال الفترة الماضية.

ويرتبط زيزو بالانتقال إلى صفوف النادي الأهلي، في صفقة مدوية عقب نهاية عقده مع الفريق الأبيض، وسط أنباء تفيد توقيعه مع المارد الأحمر لمدة 4 مواسم مقبلة.
 

أول تعليق من زيزو على أنباء توقيعه مع الأهلي

 

علق أحمد مصطفى زيزو لاعب نادي الزمالك على الأزمة التي يمر بها مع الفريق في الفترة الأخيرة، خاصةً في ظل وجود مفاوضات بينه وبين العديد من الأندية أبرزها الأهلي، وأزمة تجديد عقده مع نادي الزمالك. 
 

بيان أحمد مصطفى زيزو 
 

وقال زيزو عبر ستوري له على حسابه الرسمي على إنستجرام: "الحمد لله، أنا راجل بحترم كل الناس، لكن للأسف عدم ردي علي المعلومات المغلوطة، والتزامي الصمت زاد عن حده، كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور".

وأضاف: "بكل وضوح أنا لم أوقع لأي نادي سواء داخل أو خارج مصر، اللي حصل على توقيعي يتفضل يعلن.. إذا كان كلامه صحيح ؟.. كمان اللي عنده دليل على توقيعي لأي نادي برضو يتفضل يطلعه على الملأ.. الناس لازم تعرف كويس".

وتابع: "انا بقدر جدًا الكيان الكبير اللي أنا بلعب فيه، ولا يمكن أنكر فضله عليا لكن فيه حاجة أنا مكنتش حابب أتكلم فيها خالص، لأنه للأسف الأمور في الإعلام كلها في إتجاه واحد، ليه محدش اتكلم عن حقوقي المشروعة زي أي لاعب في الدنيا".

وأوضح: "ليه محدش اتكلم إن الناس سابتني بقالها شهور طويلة ومش عايزين يجددوا عقدي. ليه محدش اتكلم عن المستحقات المتأخرة اللي ليا بقالها كتير. ومش لاقي حد يجاوبني ليه محدش اتكلم انه التجديد المرة دي جاي في مرحلة متقدمة من عمري بالنسبة للعيبة الكورة.. ولعيب الكورة مهما طول عمره قصير في الملعب".

وواصل زيزو في بيانه: "محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده. قلت وهفضل أقول أنا منتظر كلمة النادي. ورد الاعتبارات كتير مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف الثاني يكون عايزني أكمل.. وتكون فيه استجابة لحاجه من المعروض عليا على الأقل... لكن للأسف الكلام معايا حاجة.. واللى بيتقال للإعلام حاجة تانية.. أنا مينفعش اجرح في حد. ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي.".

واختتم زيزو: "أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده. هيكون كلام غير صحيح. ورسالتي الودية جدا للمسئولين في النادي اللي أنا يحترمهم جميعا.. أتمنى الحوار في مسألة تجديد العقد يكون بيني وبينكم... مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق. شكرا على تفهمكم موقفي".